صدیقین مکتبی
عنوانلار ایچینده، یوللار ایچینده،
استاد اینجه صنعت میدانین سئچیب.
باشقالار ترپشیب، اؤلچوب، بیچینجه،
کسكین قلمیله او ووروپ كئچیب.
***
خلقین فولكولورون دیلین قورویان،
اوردونون كروانین سركرده‌سیدیر.
اوندا یورولماغین معناسی یوخدور،
سارسیلمایان اونون ایراده‌سیدیر.
***
صدیق بیر تشكیلات، او بیر حزبیدیر،
دوزگون بیر مكتب‌دی، او بیر ملت‌دیر.
اؤزونده وزیری، مشاوری‌ده،
صدیق بیر دونیادیر، او بیر دؤولتدیر.
***
عالیم فیلسوف‌دیر زمانه‌میزده،
او بیر فرهنگستان، او بیر دانشگاه،
مین‌لر اؤزونه تای طلبه‌سی وار.
او بیر علامه‌دیر هر شئیه آگاه،
***
الیندن قورتولماز بیر اوچوب قاچان.
او بیر شكارچی‌د‌یر مهارت كانی،
سودا قورولوقدا مشكلی آچار.
صدیق تسخیر ائده‌ر زمان ـ مكانی.
***
او سئل‌لره دوشوب، بورانلار سوووب،
درین دریالارین اوزگونچوسودور.
طوفانلار گئچیردیب، قار ـ قیرو گؤروب،
آغیرسیناقلارین بیرینجی‌سیدیر.
***
وجودو تلاشدیر، سعی‌دیر، اونون،
نه گئجه‌سی واردیر نه گوندوزو وار.
اونون هر سلولی حسین صدیقدی،
هر گونده ساعات دا اونون ایزی وار.
***
چوخلار دلیك دئشیك آختاران زامان،
صدیق متانتله امكان یارادیب.
دوزگون فرصتلری ایجاد ائیله‌ییب،
اونداكی ناققالار مین‌لرین اودوب.
***
ملّی حق حقوقو مدافعه‌ده،
مطلق آیری نفر اونا چاتانماز.
همیشه اؤنده‌دیر صدیق معلم،
هئچ آتلی آتینی اونلا چاپانماز.
***
فصاحت، بلاغت میدانلاریندا،
بؤیوك سخن‌راندی، بؤیوك خطیب‌دیر.
قلمین گؤتوروب كلاسا گیرسه،
میثیل‌سیز، معلم بؤیوك ادیب‌دیر.
***
صدیق بیر عمّان‌در، او بیر دریادی،
دریالار ایچینده او بیر نهنگ‌دی.
آذربایجان بویدا صدیقین آدی،
او شیردی، جنگل‌دی، او بیر پلنگ‌دی.
***
تپه‌دن دیرناغا استعداددیر او،
اونون شمّی قوی، احساسی درین.
سهل و ممتنع دیر صدیق مكتبی،
دوشونن‌لر دئییر مین‌لر آفرین.
***
دقت ائتمه‌لی‌ییك، درس آلمالیییق،
او مردمی‌لیگین پهلوانیدیر.
لیك تقلید ائتمك اونو چتیندیر،
صحنه‌نین یگانه قهرمانیدیر.
***
مدنی، علنی شیوه‌سی واردیر،
بیلر هانسی اؤلكه مملكتده‌دیر.
صدیق چوخ پخته‌دیر، كاركشته‌دیر،
بیلر هانسی شه‌هر هانسی كنده‌دیر.
***
دوشونر نه یئرده ا‌ولدوغون ایشین،
هر سؤزو هركسه دئمك دوز ده‌گیل.
بیلر خطابه‌نین گیریش ـ چیخیشین،
یئرینده اولماسا بیر سؤز، سؤز ده‌گیل.
***
سحر جادو ائده‌ر افسون ائیله‌یر،
كلمه‌لر، مفهولار اونون دیلینده.
واژه یاریسیندا كلامی كیمی،
تاپار اؤز مكانین صدیق الینده.
***
او بیر نابغه‌دیر، او بیر حكیم‌دیر،
تاپیلماز صدیقه یئر اوزونده تای.
اونون پیرولری امتی واردیر،
پیغمبرلر ایچره صدیقی‌ده سای.
***
آگاه‌دی مذهبه، دینه، فرهنگه،
یاشاییب اسلامی، مسلمانلیغی.
بوتون دوشونجه‌لر اونا محترم،
باش ساییر هر نه‌دن او انسانلیغی.
***
بیلر آدابینی، رسملرینی،
صدیق مسجدین‌ده، میخانه‌نین‌ده،
دیلین باشا دوشر دردینی قانار،
صدیق عاقیلین‌ده دیوانه‌نین‌ده.
***
تزویر ریا ده‌گیل، بو باجاریقدی،
حیله كلك ده‌گیل، بو درایتدی.
فرصت‌طلب‌لیك یوخ، نكته‌سنجلیك،
اوشونمك قورخو یوخ، بو شجاعتدی.
***
هر اویونون تكی پاتكی واردیر،
دؤیوشمده، غلبه شكست‌ده اولار.
های‌كوی‌ده شعاردا شعورلا گره‌ك،
حركتده یوروش، نشست‌ده اولار.
***
صدیق نسیمی‌دیر، عمر خیام‌دی،
حكیم‌دیر، فضولی، نباتی كیمی.
اونلاری یاشادییب اثرلرینده،
اینجه مهارتله حیاتی كیمی.
***
حیات یوللاریندا مبارزه‌ده،
ائنیش وار، یوخوش وار، اؤلوم دیریم وار،
آل ـ وئر دونیاسیدیر بیزیم دونیامیز،
اوردا «نه‌لر، آلیم نه‌لر، وئریم» وار.
***
اوچروملو یوللاردا یول گئدن كیمسه،
فرز اولسون گره‌كدی، چوخ اویاق اولسون،
ایشله‌یه‌نین الی آیاغی باتار،
آنجاق آنلی آچیق اوزو آغ اولسون.
***
مبارز اؤز سهوی غروری ایله،
زورلویا بهانه وئرمه‌ملیدی.
جانا آلمامالی تهلكه‌لری،
تدبیرسیز ایشلری گؤرمه‌ملیدی.
***
دئمیرم معصوم‌دی، اشتباه‌سیزدی،
سؤزسوز حركتین سهوی‌ده اولار.
یول گئدن بو دره‌یر ییخیلار دورار،
اشتباه ائیله‌مز یالنیز اؤلولر.
***
صدیق بیر لشكردیر تجهیز ات ایله،
او هم فرمانده‌دی، همده سربازدی،
نقشه‌سی، تاكتیكی، توپو، تانكی وار،
صدیق بیر سرداردیر، ائله جانبازدیر.
***
سنگری بوشلامیر، رزمی ترك ائتمیر،
رقیبین جنگی وار، بد آهنگی وار،
بن‌بسته یول تاپیب دوگون آچماغا،
صدیقین مین فنی، مین ترفندی وار.
***
صدیق فرصتلری الدن اؤتورمور،
هجوما كئچه‌جك یئری گلنده.
محكم‌لندیره‌جك موقعیتی،
روزگار، شرایط مهلت وئرنده.
***
بیرلحظه مرامین خلقین اونودمور،
اونون قلمی‌نین نیشی ـ نوشو وار.
گؤیده لحظه‌لری، آنلاری دوتور،
اونون نئچه نئچه سردار قوشو وار.
***
تغییر، تكامله باوری واردیر،
كرداردا، گفتارادا گؤستریب بونو،
دؤگم‌لیك، تحجّر اوزاقدیر اوندان،
كهنه‌لیك‌لر بنده چكنمز اونو.
***
ائلی‌نین اوغلودور، قهرمانیدیر،
او یاخشی تانیییر زمان مكانی،
هوشو وار، باشی وار، اشتباهی آز،
یئرینده خشله‌ییر هر بیر امكانی.
***
گونون ایشیغیندا یول ناذهن اولسا،
او گوندوز گیرله‌نیب، گئجه یول سوروب،
تاپلاشیب شاختایا، بورانا، قارا،
یازین گلمه‌سینه تدارك گؤروب.
***
مشكلات اؤنونده فیرتانالاردا،
اونون اؤز اینامی، عقیده‌سی وار،
اؤزونه مخصوص دور قورتولوش یولو،
صدیقین باخیشی، اؤز ایده‌سی وار.
***
دئییرلر توچالین بیر قلّه‌سی وار،
لاكن اللیدن چوخ اونون یولو وار،
بیر یول باغلی اولسادا داغچی دایانماز،
داغین او اوزو وار، ساغی سولو وار.
***
او یاخشی یولداشدی، یولداشا سیرداش،
وظیفه داشیار قرارا گله‌ر،
دوزگون نقشه چكه‌ر، دوزگون یئرییه‌ر،
یئرینده لاپ یاخشی سیاست بیلر.
***
اونو دوشونمه‌دی قیسا فیكرلر،
بیری قورخور دئدی بیری خور باخدی،
اولار اؤزلرینه هر نه دئدیلر،
صدیقین چشمه‌سی آخدی گور آخدی.
***
یوللاردا غیبته، تؤهمته قالیب،
اونون خدمتلری سایا گله‌مه‌ین،
بعضا یاخشی‌سینا پیس جواب آلیب،
كوردو خدمتلرین گؤروب بیلمه‌ین.
***
مثل‌دیر چوخ یئمك قویار بشری،
معمولی یاشاماق آز یئمك‌لیكدن،
یئرسیز دانیشیقلار محروم ائیله‌یر،
انسانی یئرینده حق دئمك‌لیكدن.
***
صدیق بیر معتقد مؤمن‌دی منجه،
او بیر دِمكرات منطقی انسان،
صدیقین اؤز دینی، اؤز تانریسی وار،
لذت آپارارسان اونا اینانسان.
***
صدیق معتدل‌دی یاشاییشیندا،
بیلر جامعه ده خط قرمز وار،
او، اؤزو ایراقدیر افراط تفریطدن،
بیلر سرعت‌گیر وار بیلر ترمز وار.
***
آتمیش یئتمیش نه‌دیر آی قوجا قارتال،
یوزلری وور باشا صدیق معلم!
عؤمرون اوزون اولسون بهره‌لی اولسون،
مین یاشا، مین یاشا صدیق معلم!