دیوان اشعار ترکی حکیم ملا محمد فضولی به تصحیح دکتر صدیق
صدیار وظیفه (ائل اوغلو)
چاغداش آذربایجان ادبیات تاریخینده، اونودولماز رولو اولان، ائله‌جه‌ده كلاسیك ادبیاتمیزین تانیتدیرماسیندا و اونون معاصیر ایللرده یاییملانماسیندا یوزلرله علمی مقاله‌لری ایله دؤورون ادبی گئدیشینده تأثیر ائدیجی ایزلرین صاحبی اوستاد دوكتور حسین دوزگون حضرتلری‌نین صرف ائتدیگی امه‌گی ساده‌جه تشكرلر و مینّتدارلیقلارلا ائوده‌مك اولماز.
او بیر چوخ تاریخی – ادبی سهولری اوزه چیخاردیب، ادبیاتیمیز و تاریخمیز حاقدا بیر چوخ دوزه‌لیشلر آپارمیشدیر. منجه داها اؤنملی ایشلریندن بیری قارامجموعه‌نین اوزه چیخاردماسیدیر؛ لاكن داها آرتیق كلاسیك و چاغداش شعریمیزله ماراقلاندیغیما گؤره اوستادین ایكی ایل اؤنجه «تصحیح و تدوین» ائتدیگی «دیوان اشعار تركی فضولی» آدلی اثرینه دایر فیكر معادله‌سینده اولماق ایسته‌ییرم. یاخشی بیلیریك كی كلاسیك آذربایجان شعری‌نین شاه‌دیره‌گی اولان مولانا محمد فضولی‌نین گنئیش یاردیجیلیق دونیاسی، داها گئنیش صورتده یاییلانان ملّی شعریمیزین بیری‌دیر. كلاسیك شاعرلریمیز آراسیندا، هیچ كیم فضولی قده‌ر یایملانمامیشدیر. لاكن اوستادیمیز دوكتور حسین محمدزاده صدیق(دوزگون)ین تدوین و تصحیح ائتدیگی اثرده بیر چوخ یئنی ملاحظه‌لر و آرتیرمالار و دوزه‌لیشلر گؤروروك؛ كی ایندی‌یه‌ده‌ك آذربایجان و توركیه تدقیقات‌چیلاری‌نین و فضولی شناسلاری‌نین گؤزوندن یایینمیشدیر. خوشبخت‌لیك بوراسیندا كی اوستاد، فضولی دیوانین دا گئدن یانلیش‌لاری اصلاح ائتمیش و دیوانین داها سونونجو و داها حقیقی سیمانی اوزه چیخارماقلا بعضی غلط نشرلرین سهل سایدیقلاری عیب‌لری‌ده اصلاح ائتمیشدیر. تام گونده اولان شیوه‌ده تصحیح و تدوین ائتدیگی دیوان فضولی‌ده، شاعیر حاققیندا سندلر و قئیدلر- ایلك علمی ایشلر و ایراندا نشر اولان اثرلرین معرفی‌سی- فضولی چاغی بغداد دا آذربایجان ادبیاتی ـ فضولی‌نین یاشاییشی ـ فضولی‌نین اثرلری ـ فضولی‌نین دیلی و شیوه‌سی، فضولی شعری‌نین بیر پارا مضمونلاری- «دیوان اشعار تركی فضولی» [فضولی]نین حاضیرلانماسی اوستادین وئردیگی فاکتا گؤره دیوان اشعار ترکی فضولی ایلك دفعه تبریزده 1244 هجری قمری ایلینده داش باسما (چاپ) اصولو ایله نشر اولموشدور. ماراقلی‌دیر كی چاپ صنعتی اؤلكه‌یه گلدیكده 185 ایل اؤنجه دیوان فضولی بیرینجی دؤنه تبریزده و سونرا 10 ایل اوندان سونرا مصر اؤلكه‌سینده «بولاق چاپخاناسیندا» نشر اولور- اوستادین نشره وئردیگی دیوان اشعار تركی فضولی‌ده بیر چوخ یئنی ایشلرین اولماسی یقین كی اثرین بارز و قاباریق خصوصیاتینی قورویوب ساخلاجاقدیر. ملافضولی‌نین اعتنا ائتدیگی شاعیرلری معین‌لشدیرن عالیم گؤستریر كی محمد فضولی، سلمان ساوجی، سعدی، حافظ، نظامی گنجوی و خواجو و كاتبی‌دیر. اوستادین ایثباتینا گؤره تبریزلی صائب‌ین شعر عالمینده اولگوسو ائله فضولی اولوبدور.
اختر اینتشاراتی‌نین 1384- گونش ایلینده تبریزده نشر ائتدیگی دیوان فضولی گونوموزون علمی شیوه‌سی ایله تدوین اولونموش اؤنملی بیر اثردیر. اوخوجو فضولی‌نین سونونجو ایللرده الده ائدیلن شعرلری ایله ائله‌جه‌ده اونون تحلیل‌لری ایله و چتین بیت‌لرین و اصطلاح‌لاری‌نین ایضاحلاری ایله استلاشیر. یقین كی بو دیركی علمی ایش ادبیاتیمیزا اولدوقجا فایدالی اولاجاقدیر. اوستادیمیزی و ادبیات سئوه‌رلی بو اؤنملی ایشه گؤره بیر داها تبریك ائدیرم.