یاز صدیق

دکتر صدیق ساغدی هنوز قالیری،

او تبریزه هله ا‌یشیق سالیری.

کتاب اوسته گینه کتاب قالیری،

                         او باسواد بیر کیشیدیر، بیر عارف،

                         یازیر شهره دایرة‌المعارف.

 

دئدیم اونا:«ـ استاد اؤزووو یورما،

چوخ ایشله‌ییب جانیوا صدمه وورما.»

دئدی:«ـ بابا قوی گئت، بئله چیغیرما!

                         بو فیکری سن اؤزون منه وئریبسن،

                         ایندی گلیب منی حذر ائليریسن؟

 

کؤمک ائله بو ایشیمی قوتاریم،

بو بارلی مزرعه‌نی من سوواریم.

بو یولدا اول منیم کؤمه‌گیم یاریم،

                         ائیله‌مه‌سن کؤمک بو قارداشیوا،

                         گنا‌هینی ساللام من اؤز باشیوا.»

 

دئدیم کی:«ـ یاز دورما سنه عشق اولا،

عرفان شرابیله پیاله‌ن دولا،

نییه گره‌ک سنین کیمی گول سولا.

اللی ایللیک دوسلوغوموز وار اولسون،

کیتابلارین گول اولسون گولزار اولسون.

 

دائرة ‌المعارفی یاز صدیق،

ای کتابا عاشیق! کتاب باز صدیق!

قازیلمامیش خزینه‌نی قاز صدیق،

                         بیر گون گؤروم نورون عالم‌تاب اولسون،

                         دایرة ‌المعارفین چاپ اولسون.

 

سنین عمرون گؤروم استاد یوز اولسون،

قوی بودا بیر مثل اولسون سؤز اولسون،

هر تبریزلی «دوزگون» کیمی دوز اولسون.

                         صداقتین نثار ائتسین تبریزه،

                         گول چیچک دسته‌سیله گلسین بیزه.

 

دیریلیگینده من قدرینی بیلدیم،

زمانه‌نین توزون اوزوندن سیلدیم،

گؤی گؤزونه باخدیم سئویندیم گولدوم.

                         سنه بخش ائده‌رم هر نه واریمی،

                         الیمدن وئرمه‌رم سن تک یاریمی.

 

بیر آدین دوزگوندور بیری صدیقدیر،

بوتون تبریزلیلر سنه رفیقدیر،

«ارکین» سنه رفیقدن ده شفیقدیر.

                         سنین بیرجه اشاره‌نله قاچارام،

                         قاپیلاری قاباغیوا آچارام.»

نوشتن دیدگاه


تصویر امنیتی
تصویر امنیتی جدید